PRAKTIKETAKO GURE ESPERIENTZIA - EL EKIPO A

Praktiketatik itzuli berri garen aste honetan, taldekideok bizitako esperientzia ezberdinen inguruan hitz egiten aritu gara. Ikastetxe bakoitzaren lan egiteko modua desberdina dela ikusi dugu eta bakoitzaren alde on eta txarrei buruzko hausnarketa bat egin dugu. Solasaldi honen bidez lortu ditugun ideiak oso interesgarriak iruditu zaizkigu eta zuekin partekatzea bururatu zaigu. Azaletik eta modu orokor batean dago idatzita, baina, atera ditugun ondorio edo ideia garrantzitsuenak bertan txertatzea lortu dugula deritzogu.

Irakurri eta idatzi zuen esperientzian oinarrituz gurekin ados zaudeten edo ez.

1.- Metodologia

Gure praktikaldiari buruz hitz egiten hasi garenean metodologia desberdinak aurrera eramaten dituzten zentroekin aurkitu garela ohartu gara. Alde batetik, irakasgaiak modu tradizionalean kokatzen den Txanela proiektuan oinarritzen direnak ditugu. Bestetik, proiektuetan oinarritzen den sistema ikusi ahal izan dugu. Ezberdintasunak ugariak direla kontuan hartuta, hauen inguruan aipatu genitzakeen onurak eta kalteak adostu ditugu.

Lehenik eta behin, irakaslearen segurtasunari begiratuz, esan dezakegu Txanela proiektuak irakaslearen konfiantza bermatzen duela. Horrez gain, gelaren kontrola izatea errazten duela iruditzen zaigu. Nahiz eta kontrol hori zenbaitetan onuragarria izan, irakaslearen askatasuna ere neurri batean mugatu egiten du, proiektuetan ez bezala. Hauetan, irakasleek nahiz ikasleek erabakiak hartzeko aukera handiagoa dute. Gainera, proiektuetan lan egitean irakasleak ikasle bakoitzaren beharretara egokitzeko aukera zabalagoa du eta ikasleen talde lana sustatzen da elkar lanean arituz. Hala ere, txokoka lan egiteak aurre prestakuntza handiagoa eskatzen dio irakasleari helburuak bete nahi badira.

2.- Materialak

Materialari dagokionez, metodologiarekin erabateko lotura duela ikusi dugu. Txanela proiektuan esaterako, irakasgai bakoitzeko hainbat liburu zeuzkaten. Hauetaz gain, irakasleak lortutako fitxa solteak ere burutzen zituzten eta baita ordenagailuak ere. Gainera, irakurketa sustatzeko liburu ezberdinak aurkitzen ziren gelan. Proiektuka lan egiteko, aldiz, material anitzagoa behar da. Testu liburua matematika gaia lantzeko soilik erabiltzen zuten. Gainontzean, txoko bakoitzean material ezberdinarekin aritzen ziren lanean. Plastilina, gometxak, kartoia, lego piezak, metroa, eraikuntzarako piezak, puzzleak, bingoa… eta beste hainbat jolas. Horrez gain, laguntza gisa erabiltzeko material ugari aurki zitekeen gelan. Hiztegia, alfabetoa hitz larri eta xehekin, zenbakiak azpian izenekin, Atlasak, abakoak, mapak…

Honenbestez, proiektuka lan egitea askoz aberatsagoa dela iruditzen zaigu material aldetik.

3.- IKT erabilera

Orokorrean, ikastetxeetan teknologia berriak ez daude oso txertatuta. Gure esperientziari dagokionez, erabilera ugariagoa izan da Txanela proiektua lantzen duten zentroetan. Hauetan ikasys proiektua martxan jarriz, ordenagailuetan ariketak egiten dituzte. Arbel digitalaren erabilera ere anitzagoa da. Izan ere, gela bakoitzak hauetako bat du. Horrez gain, ordenagailua erabiltzeko oinarrizko pauta batzuk ere irakasten dizkiete baita mekanografia ere. Proiektuka lan egiten den eskoletan, ordea, ez zaigu tokatu teknologia berriak erabiltzen diren egoerak bizitzea. Teknologia berriak presentzia izan duten kasuetan ikasleen jarrera pasiboa da, pelikulak ikusi edo abestiak entzutea esaterako. Hala ere, ikastetxe gehienek euren blog-a dutela jabetu gara, gurasoek eskolan egindakoaren berri izan dezaten: http://hamaikaartistak.blogspot.com.es/, http://hogeifantastikoak.blogspot.com.es/, http://igeldoeskola.blogspot.com.es/, http://2015irurakolh4b.blogspot.com.es/.

4.- Harremanak

Orokorrean, ikasle gutxiko eskoletan sortzen diren harremanak oso estuak dira, bai irakasleen artean, bai ikasleen artean, bai irakasle-ikasleen artean eta baita irakasle-gurasoen artean ere.

Zikloka banatuta dauden ikastetxeetan, ikasleak ez dira beti taldekide berdinekin egoten, urtero taldekide desberdinak izaten dituzte eta honek umeen arteko harremanak sustatzen ditu. Jolas-orduan esaterako ziklo guztietako haurrak nahasturik ibiltzen dira jolasean, zenbait kasutan HH-ko haur batzuk ere parte hartzen dutelarik jolas horretan.

Irakasle gutxi direnez eta, irakasle guztiek haur guztiak ezagutzen dituztenez, elkar-lanak izugarrizko garrantzia du eta harreman sendoak sortzen dira. Irakasleek ume bakoitza ondo ezagutzeko aukera duenez, bere egoerara eta gaitasunetara egokitzeko ahalmen gehiago du eta laguntza maila handiagoa eskaintzea lortzen da. Gurasoak ere oso aktiboak dira eskola txikian, ahal duten guztietan esku bat botatzen diete irakasleei, irteerak, lantzen ari diren gaiaren inguruko azalpenak emateko, eskolako konponketak egiteko, beharrezko materiala uzteko, kirol arloa antolatzeko....

Bestalde, izugarrizko aldea dagoela ikusi dugu ikasle kopuru handiko ikastetxeetan. Santo Tomas Lizeoan ikasleen arteko harremanak itxiak dira, gelako ikaskideen artean mugatzen baitira. Hainbeste ikasle izanik, jolas-ordu ezberdinak erabili behar izaten dituzte guztiek tokia izan dezaten, eta honek beraien arteko harremanak murrizten ditu. Bestalde, irakasleekin duten harremana ona izan arren, eskola txikietan baina hotzagoa da. Gurasoekiko harremanari dagokionez ere gauza berdintsua esan dezakegu, orokorrean laguntzeko prest azaltzen direlarik.

TALDEKO ARGAZKI ELKARRIZKETA - EL EKIPO A

Taldekide bakoitzaren argazki elkarrizketa ikusi eta konparaketa bat eginez, 10 ekintza edo momentu aukeratu ditugu. Une hauek teknologia erabiltzen ez dugunean egitea gustatzen zaiguna erakusten dute. Ez dugu argazki bakoitza azalduko, bakoitzak argazki-elkarrizketa pertsonalean ekintza hori aukeratzearen zergatia idatzi dugulako iada eta interesa izanez gero, argazki elkarrizketa indibidualak ikusteko aukera duzuelako!

1-KIROLA

2-JATEA

3-LAGUNAK

4-FAMILIA

5-UDARA

6-BIDAIATZEA

7-ERRUTINA APURTZEA

8-MUSIKA

9-LO EGITEA

10-TONTOARENA EGITEA

NIRE ARGAZKI ELKARRIZKETA

Urtez urte, gizartea aurreratuz doa, eboluzionatuz, aldaketa infinituren aurrean moldatuz eta aurrera jarraituz. Horrela, gizartea osatzen dugun indibiduo bakoitzak ere, aldaketa hauen aurrean geure bizi modua moldatu behar izaten dugu, behar eta betebehar berriekin.
Horrela, geure gizartean teknologia berrien presentzia handiagoa egiten joan da, gizakiak hauenganako dependentzia pairatu arterainokoa. Badirudi, gaur egun, gizakiok teknologiaren ausentzian ezin dezakegula bizi, baina ausnartzen hasten bagara, ikus genezake nola gaur egun ere, gustukoen ditugun gauzen artean, teknologiak toki gutxi duela.

1.- Itsasoa



2.- Marraztea



3.- Jatea



4.- Mendira joatea



5.- Hondartza



6.- Lagunekin egotea



7.- Musika



8.- Zarauzko kanpinean ilunabarraz gozatzea



9.- Bidaiatzea




10.-Zaldian ibiltzea

IÑAKI PAGOLA: ADUNAKO ESKOLA TXIKIA

Iñaki Pagolak Adunako eskolari buruzko hitzaldia eman zigun asteartean (2015-09-29), IKT-etan zentratuz nagusiki.

Aduna Gipuzkoako barnealdean aurkitzen den 400 pertsonako herri bat da eta 68 ikaslez osatutako eskola txikia aurki dezakegu bertan. Eskola honen antolamendua, beste eskola gehienekin konparatuta, desberdina da, zikloak nahastuz aritzen baitira lanean, adin tarte desberdineko haurrak elkartuta alegia. H.H.2-tik L.H.1-era bitartean dauden haurrak talde bakar batean biltzen dira eta 12 besterik ez daude. L.H.2 eta L.H.3-ko ikasleak ere elkarrekin ikasten dute eta 15 ikasleko taldea osatzen dute. Eta azkenik, L.H. 4-5 eta 6-ko ikasleak ditugu, 11 denera. Lan hau burutzeko 9-10 irakasle daude Aduna eskolan.

Baina ezaugarri hau ez da Adunako eskola beste ikastetxeengandik desberdintzen duen bakarra. Bertan proiektuen bidez egiten dute lan, gai desberdinak lantzen eta aztertzen dituzten proiektuez osatuta dago beraien ikaskuntza prozesua. Proiektua Alkiza eta Berrobiko eskolekin elkarlana eginez eramaten da aurrera, hezkuntza aberasgarriago bat lortuz. Horretarako, testu liburuak albo batera utzi eta IKT-en erabilera anitza egiten dute. Honek harreman zuzena du eskolak duen heldutasun maila aurreratuarekin. Ikastetxe baten IKT heldutasun maila, zentru horrek duen digitalizazio mailarekin lotuta bait dago.

Adunako eskolan dohaineko aplikazioak erabiltzen dira, eta ikasle bakoitzak bere erabiltzailea izaten du Google Apps erabilli ahal izateko (drive, google+, blogger…).

Irakasleek kuaderno digitala erabiltzen dute. Kuaderno digitala, egin beharrekoak zehazteko, landutako konpetentziak biltzeko, lantzeko moduak azaltzeko, helburuak zehazteko… balio duen dohaineko baliabide bat da. Bertan lehenago aipatutakoaren inguruko hainbat datu bildu ditzakegu eta dataren arabera sailkatu eta ordenatu. Gainera, edonon erabili dezakegun baliabidea da, eta edozein momentutan eskuratu dezakeguna. Ikasleen ebaluazioen inguruko argibideak ere idatzi ohi dituzte kuaderno digitaletan, aurrerapenak, akatsak, ongi egindako gauzak… eta beste irakasleekin partekatzeko aukera ere izaten dute. Irakasleek Calendar izeneko aplikazio bat ere erabiltzen dute egingo dituzten zereginak zein diren jakinarazteko, irakasleek gainontzekoak non dauden jakin dezaten.

Ikasleei dagokienez, irakasle eta ikasleek osatzen duten plataforma bat dute. Plataforma honen izena Classroom da eta honen bitartez posible zaie hainbat lan aurrera eramatea ordenagailu bidez. Bertan, ikasleek egiten dituzten lanak partekatu ditzakete irakaslearekin eta honek, zuzenketak egin ditzake. Bestalde, irakasleak ere  hainbat gauza partekatu ditzake plataforma honetan, bai bideoak, testu interesgarriak, irudiak… ikasleenganaino iristeko.

Lanak zergati bat izaten dute, praktikotasun bat. Kasu errealak erabiltzen saiatzen dira ikasleek gauzak errazago ikas ditzaten eta jasotako informazioa benetan barnera dezaten, teoria hutsean geratu gabe. Informazioa barneratzeko, ikasten duten hori praktikan jarri dezaketela ikustea da egokiena, ikasten duten horrek zerbaitetarako balioko diela ikustea.

Amaitzeko, Adunako eskolako sistema laburbilduz, hezkuntza eraginkor, dinamiko, aktibo, kooperatibo, elkarreragile eta parte-hartzailea sustatzen duela esango genuke, metodologia berriak aplikatuz, IKT- en erabilera eta jakintza bultzatuz, eta irakasle-ikasle harremanak indartuz.

AMANDO: AMARA BERRI

Amandok, Amara Berriko ikastetxeari buruzko hitzaldia eman zigun aurreko asteartean (2015/09/22), IKT-en inguruan zentratuz nagusiki eta berak esandakoa laburbilduko dut ondorengo lerroetan.

Lehenik eta behin, eskolako antolaketari buruz hitz egin zigun, Amara Berri Sistema izenez ezagutzen dena. Eredu tradizionalaren albo batera utzi eta proiektu bidez egiten dute lan. Zikloetan egiten dute lan, hau da, adin tarte desberdineko haurrak elkarrekin egoteko aukera dute, zaharrenek txikiagoei gauzak irakatsiko dizkietelarik. Lana txokoetan burutzen da eta departamendu ezberdinak daude; irakasle bakoitzak gela finko bat du eta haurrak gelaz gela mugitzen dira. Horrezgain, ez dituzte hain ohikoak diren testu-liburuak erabiltzen, liburutegian eta interneten oinarritzen dira ikasleak lana egiterako garaian. Amara Berriren kasuan liburutegia ez da gela berezi batean kokatzen, liburuak haurrak erraz erabiltzeko moduan daude kokaturik, edozein tokitan. Proiektu bidez lan egitearen abantailetako bat egiten den orok “zertarako” bat duela da; honi esker, haurrak ekintzaren balioaz jabetzen dira eta gogotsu egiten dute lan.

IKT-etan zentratuz, hedabide ez berdinak erabiltzen zituztela esan zigun Amandok. Hedabide hauek ikasleek kudeatzen dituzte, eurak dira telebista, irratia, prentsa eta txikiweb aurrera eramatearen arduradunak. Hedabide hauek erabiltzearen helburuetako bat, egiten diren lanei zentzu bat, irteera bat ematea da. Beste helburu garrantzitsu bat teknologia berrien munduan sakontzea, aplikazio ezberdinak ezagutu eta probatzea, nola erabili behar diren ikastea…

IRRATIA: irratiko saioa auzoan entzun daiteke FM 107.2 jarri ezkero, eta baita Amara Berriko web orrialdean ere. Teknikariak edo arduradunak 2.zikloko 2 ikasle izaten dira, eurak sortzen dute saioa.

PRENTSA: Amara Berri Egunkaria (ABE) argitaratzen dute. Egunkariak atal ezberdinak ditu, azala, elkarrizketa, eguraldia, kontu-kontari, gu ere idazle, lumaren kilima, saski naski eta denbora pasak hain zuzen ere. Egunero irakurtzen da fotokopiatuta eta arduradunak 3.zikloko 4 ikasle izaten dira. Egunkaria egin ahal izateko, irakasleen laguntza izateaz gain, bilerak ere egin behar dituzte.

TELEBISTA: tresna zoragarria da haurrak euskaraz, erdaraz edo ingelesez modu natural batean hitz egiteko. Grabatzeko eta editatzeko aukera dago eta lan hau egiteko arduradunak 3.zikloko 4 ikasle izaten dira. Telebistako saioa gela guztietan ikus daiteke eta web-ean ere publikatzen da etxekoek ere ikus dezaten.

TXIKIWEB: web orrialdeak atal desberdinak ditu, ongietorria, artisten galeria, argazki albumak, ABI telebista eta ABI irratia esaterako. Webmasterrak edo web arduradunak 3.zikloko ikasleak izaten dira.

Lehen esan bezala, Amara Berrin zikloka egiten da lan. Hedabideei dagokienez, zikloka eta bikoteka egiten dute lan eta 2 egun eskaintzen dizkio bakoitzak lan honi. Modu honetan arituz, lana kate moduan egitea lortzen da. Honek esan nahi du lehenengo aldian ikasi egiten dela gauzak egiten eta bigarrenean irakatsi. Adibidez: lehenengo egunean Manuelek Joni erakusten dio, bigarrenean Jonek Maiteri erakusten dio, hirugarrenean Maitek Edurneri…

Ikasleak gogotsu aritzen dira lanean modu honetan, askatasuna dutelako. Amandoren ustez eta Amara Berriko Sistema erreferentziatzat hartuz, irakasleak “txapa” botatzean ikasleek ez dute ikasten eta beraz, irakasleek ez dute irakasten. Hona hemen ikasleek esperimentatuz, askatasunez eta autonomiaz lan egitearen garrantzia. Modu honetan ematen da benetako ikaskuntza prozesua, egiten denari erabilgarritasuna edo zerbaiterako baliagarria dela ikusi eta norberak esperimentatu eta gustatzen zaiona eta ez zaiona ezagutu, nahi duen bezala diseinatu… hori da guztion artean lortu behar dugun irakaskuntza-ikaskuntza prozesua.

Hauxe izan da guztia lagunok!

Taldeko SYMBALOO

TEKNOLOGIAREN INGURUKO TALDEKO ONDORIOAK - "EL EKIPO A"

Norberak gure ondorio propioak atera ostean, taldea elkartu, iritziak partekatu eta konklusio amankomun batzuetara iritsi gara teknologiaren inguruan. Hainbat gai landu ditugu, aisialdia, hezkuntza eta generoa besteak beste, eta hauek nola dauden harremanetan teknologiarekin.

Gaur egun lehen baino teknologia gehiago erabiltzen dugu; esaterako, gu haurrak ginenean ezkutaketara, futbolean edo aita ametara jolasten genuen herriko plazan eta parkean. Orain, aldiz, gauzak aldatu egiten dira. Herriko plazara eta parkeetara begiratu eta bertan ikus ditzakegu 5-6 urte besterik ez dituzten haurrak gurasoen mugikorrekin edo tabletekin jolasean. Guk ez genuen horrelako teknologiarik behar ondo pasatzeko, nahikoa genuen arratsaldea lagunekin polizia eta lapurretara jolasten igarotzea. 5-6 urteko haur hauek mugikorrekin jolastearen errudunak gizartea eta gurasoak dira, teknologia askoz ere sartuago baitago gure bizitzetan orain. Horregatik, lehen ez genituen ikusten gure gurasoak tabletekin, baina, gaur egun hala ikusten dituztenez, helduen eredua imitatzen dute.

Horrez gain, konturatzen gara hezkuntzan geroz eta teknologia gehiago erabiltzen dela. Eskoletan ordenagailuak erabiltzen badituzte, ezin diegu eskatu haurrei hortik kanpo ez erabiltzea, azken batean, eskolan ikasitakoa eskolaz kanpo ere aplikatzen baitute. Aldeko eta kontrako iritziak egon arren, teknologia garatzen doan heinean, hezkuntzak ere aurreraka joan behar du, horregatik, egokia iruditzen zaigu horrelako baliabideak sartzea hezkuntzan, hori bai, dena bere neurrian, oreka bat mantenduz.

Gainera, gure aisialdian teknologiarekin lotuta, genero ezberdintasuna nabarmena dela ohartu gara, desberdintasun ugari daudela. Adibidez, aisialdiarekin lotuta askoz ere aukera gehiago ematen zaizkie mutilei neskei baino, bideojokoen munduan sartu eta bertan murgiltzeko.

Nahiz eta txikitan ez konturatu, ezberdintasun hau argi eta garbi ikusten da telebistan eta iragarkietan; esaterako, “cooking mama” eta horrelako sukaldaritzako edo haurrak zaintzeko jolasen iragarkietan beti neska bat agertzen da, eta alderantziz agresibitatea, tiroak eta kirolekin erlazionatutako jolasetan, gehienetan mutila. Honi, “gameboy advanced sp girls edition”-en iragarkia gehitu geniezaioke, hau arrosa zen. Zergatik neskona arrosa?

Gizartea pixkanaka honetaz ohartzen ari dela uste dugu, kontzientzia apur bat hartzen ari dela, guk badugu esperantza hau aldatuko dela, pixkanaka eta mantso baina iritsiko dela aldaketa, denon laguntzarekin.

Bestalde, gure ustez, honek ez du denongan eragiten, eragina izugarria izan arren eta gu neskak izanik, grand theft auto edo call of duty-ra jolastuak gara.

Azkenik, teknologiak komunikazioan izan duen eraginaz hitz egingo dizuegu. Komunikatzeko moduak pila bat aldatu dira gaur egun. Adibidez, jendea ez da kapaza aurpegira hitz egiteko, eta ondoren, sare sozialetatik izugarrizko elkarrizketa ematen dizu, oso sinpatiko dagoelarik, baina, ondoren, kalean gurutzatu eta ez dizu kasurik egiten. Azken finean, teknologiak sozializazioa mugatzen duela uste dugu, garai batean baina gutxiago sozializatzen garelarik, nahiz eta eguna whatsapp-etik jende ezberdinarekin hitz egiten pasatzen dugun. Esaterako, lehen autobusean edo trenean aldamenean esertzen zenarekin hitz egiten genuen, nahiz eta ez ezagutu, orain, aldiz, bakoitza geure mugikorren pantailei begira joaten gara, jolasten, musika entzuten, hitz egiten…  Azkenean, teknologiarekin eta sare sozialekin lortu dugu ez gaudela ez parean dugunarekin eta ez pantailaren atzean dagoenarekin.

Honako hauek izan dira “El ekipo A”-k atera eta eztabaidatu ditugun ondorio nagusiak teknologia eta hainbat arloren inguruan!

Jarraian, movenote izeneko aplikazioa erabiliz, ondorio hauek laburtu eta bideo bat sortu dugu:

Taldeko ondorioak, movenote

MAPA KONTZEPTUALA:

SYMBALOO

DENBORA LERROA

DENBORA LERROA

TEKNOLOGIA ETA GENEROA

Jaiotzen garen une beretik guztiz kondizionatuak gaude, haurrak garenetik helduarorarte gure egunerokotasunean kondizionamentu hauek pairatzen ditugu, ia ohartu ere egin gabe geure nortasuna aldatzeraino eragiten gaituztelarik.
Aipatutako baldintzapenen barnean toki asko akupatzen dute gure haurtzaro eta gaztaro osoan aisialdian egiten ditugun denbora-pasek eta jolasek. Oso txikiak garenetik, mutila ala neska izanagatik asko markatzen da gustatu behar zaigun hori, horrela, gure bizitza osoan patroi horien menpean aritzen garelarik.
Haurrek teknologiarekin duten harremanaren inguruan ausnartuz, ohartu naiz nola oso ezberdina den mutil batek teknologia munduarekin duen hartu emana neska batenarekin alderatuta; mutilei oso gaztetatik bultzatzen zaie teknologia munduan barneratzera, play station, gameboy eta antzeko jolasak beraien inguruan diseinatu eta hauei zuzenduak izanik. Nesken artean berriz, teknologia mundura bultzatzeko indar hori murritzagoa dela nabari da; gizarteak, edo hobeki esateko merkatuak, nesken artean bestelako jolas batzuk buktzatzen ditu, teknologiaren inplikaziorik ez dutenak, eta teknologiarekin lotutako jolas urri hauek zaintzaren eta sozializatzearen ingurukoak izan ohi dira.






Haurtzaro eta gaztaro osoan zehar generoaren inguruan markatzen diren muga eta ezberdintasun hauek beren ondorioa erakusten dute pertsona helduarora iristen denean. Inguruan dugun mundua erreparatzen badugu ohartuko gara nola teknologiarekin lotuak dauden lanpostu gehienak gizonezkoen esku daudela, baita emakumezkoen kasuan, lanpostu gehientsuenak zaintzaren eta harremanen ingurukoak direla ere.

Ezin esan dezaket ordea, garaiak aurrera doazen einean gauzak aldatu gabe jarraitzen dutela; berdintasunaren aldeko mugimendu askoren ondorioz kondizionamentu hauek gutxitzen doaz, bakoitzari, den generokoa delarik ere, bere kabuz aukeratzeko eskubidea emateko bidean baikoaz. Hala ere, bide oso luzea dugu aurretik, beraz egunerokotasunean somatzen ditugun influentzia hauek ikuspegi kritiko batetik begiratzeko ordua iritxi zaigu!

PLE- JORDI ADELL

Haurtzaroko oroitzapenak eta teknologia

Gizartea aldatuz doa urtez urte, eboluzionatuz, eraldatuz, sortuz... gauzak horrela, geure bizitza osoan zehar, eraldaketa hauen lekuko izatea tokatu zaigu guztioi; bai etxeko ohituretan, bai lagunartean, bai kaleko giroan, eta baita hezkuntza munduan ere. 

Neure haurtzaroko oriotzapenez idatziko dut gaurkoan, baina esan beharra dut, hortaz ausnartzen hasi orduko gaur egungo haurtzaroa eta nirea alderatzeari ekin diodala.

Sentipen polit eta goxoak ekartzen dizkit haurra nintzeneko garaiak gogoratzeak, batetik, familiako giroagatik, baina baita, eskolako garai alaiengatik ere. Salbatore Mitxelena ikastolan egin nituen nire ikasketak, 16 urte egin nituen bertan, eta zein baino zein garai zoriontsuagoak izan zirela esan dezaket!

Nire haurtzaroa gogoratzean, irakasle batekin egondako hiru urteak etortzen zaizkit gogora segituan. Apaingarri eta marrazki koloretsuz betetako ikasgelara joaten ginen egunero, lagun giroan, eta bertan Txapas izeneko aipatutako irakaslearekin elkartzen ginen. Irakasle honekin kantuan jarduten genuen ia egun osoa, baratze bat ere bagenuen ikasgelan, oiloak patioan etb. Arteari ere izugarrizko garrantzia ematen zion, astero Mendi pintorearen bisita izaten genuen, eta kalera ateratzen ginen paisaiak marraztera; Gorriti eskultorearen etxera ere noiz nahi joaten ginen, natura eta artearekin harremanetan jarriz. Garai honetan, izugarri ikasi genuen, haur izaten uzten ziguten bitartean, inguruko guztiari buruz jakinmina sotuz!

Ikastolatik atera ostean, bizikletak hartu eta inguruan bizi ginen guztiok gure auzora bueltan joaten ginen, etxetik pasa, askaria hartu eta berriz kalean elkartzeko. Harrapaketan, ezkutaketan, baloiarekin jolasean, soka saltoan etb. igarotzen genuen arratsalde osoa, afaltzeko ordua iritsi eta guztiok etxera joan arte.

Nire haurtzaroan teknologiak ez du presentzia gehiegirik izan, ezin esan dezaket garrantzizkoa izan ez denik ordea. Hezkuntzaren alorrean, ez zitzaien protagonismorik ematen teknologia aurrerapenei, gutxitan erabiltzen baikenituen ordenagailuak, eta musika aparailuen erabilpena ere ez zen oso handia. Eskolatik kanpo, jolasteko orduan, aparailu teknologikorik erabiltzen ez genuen arren, etxean telebistak bazuen bere garrantzia.

Lehen esan bezala ordea gizartea etengabeko eboluzio batean doa aurrera, eta horrek gizarte osoari eragiten dio. Gaur egungo haur edo gaztetxo batek bere egunerokotasunean teknologiarekin hartueman oso estua du, bai bere hezkuntzan eta baita bere sozializazio prozesu osoan ere. Hezkuntzari dagokionez, ordenagailu eta internetaren erabilera izugarri handitu da, hezkuntzaren ezinbesteko elementu bihurtuz. Horrez gain, mugikorrak eta jolku elektronikoak direla eta, jolasaren kontzeptua aldatu egin da, baita lagunekin eta etxekoekin pasatzeko denbora mugatu ere.

Denak bezala, teknologia aurrerapenek ere badiztuzte bere alde on eta txarrak, hauen erabilpena neurtzean dago gakoa; hau neurtu eta mugatzen ez badugu, batek daki teknologiarekin dugun dependentzia norarte iritsi daiteken!

Hurrenarte!